جزء كبير من حياة أي رائد أعمال بتعتمد على التعليم بشكل مستمر؛ وده مش بس علشان يساعدك تنمي العقلية المناسبة لإدارة مشروعك، لكن كمان علشان تخليك دايماً مطلع على التغيرات اللي بتحصل في السوق وتعرف عن التحديات الجديدة اللي ممكن تواجهك وإزاي تقدر تحلها.
ولأن مبادرة رواد النيل مؤمنة بأهمية المعرفة والقراءة في أي مجال، جمعنا لك أفضل كتب في ريادة الأعمال علشان تبني وتقود مشروعك بنجاح وتكون ملم بالسوق وتقدر تتعامل مع عملائك:
1. كتاب The 7 Habits of Highly Effective people– للمؤلف ستيفن كوفي
ده من اهم كتب ريادة الاعمال الكلاسيكية واللي من خلالها حقق المؤلف قائمة من العادات اللي بتساعدك تحقق أهدافك. الكتاب باع ٢٥مليون نسخة وتم ترجمته لـ ٤٠ لغة.
2. كتاب Tribes – للمؤلف سيث غودين
الكتاب ده يعتبر من أكتر كتب ريادة اعمال تميز لإنه بيتطرق لموضوع مهم جداً وهو أهمية دور المجتمع في نجاح الأعمال التجارية، وبيشرح إزاي الطبيعة البشرية بدأت بقبائل وإزاي لغاية دلوقتي الأشخاص المتشابهين في التفكير بيدوروا على فرصة تجمعهم علشان يقدروا يحققوا أي تغيير.
3. كتاب Good to Great– للمؤلف جيم كولينز
الكتاب ده بيجاوب على سؤال مهم اوي ” ليه شركات بتنجح وشركات تانية بتفشل؟” بعد دراسة مؤلفه لـ ٢٨ شركة ناشئة لتحديد أسباب النجاح والفشل، وضح جيم كولينز أهم الأشياء اللي لازم تكون في كينونة الشركة من اول يوم علشان تساعد في نجاح مشروعك.
4. كتاب Zero To One – للمؤلف بيتر ثيل
ده كتاب ريادة أعمال مُفصَّل بيشرح الرحلة الطويلة اللي بتحتاجها لتأسيس شركتك، وإزاي تخطط صح لمستقبل البيزنس الخاص بيك عن طريق الاستفادة من التجارب الناجحة وتجنب الأخطاء المتكررة.
5. كتاب The Startup of You – للمؤلف ريد هوفمان
الكتاب ده يعتبر خلاصة تجربة أحد مؤسسي LinkedIn واللي بيشاركنا فيه خبراته وأسرار التعامل مع تقلبات البيزنس، وإزاي تقدر تقيم ذاتك ومهاراتك حتى لو مش عندك مشروع مُعين.
6. كتاب How To Win Friends And Influence People – للمؤلف ديل كارنيجي
الكاتب بيناقش واحدة من أهم سمات رائد الأعمال الناجح وهي قدرته على التأثير في الناس وتكوين العلاقات علشان يقود فريق عمل ناجح.
7. كتاب Jab, Jab, Jab, Right Hook – للمؤلف جاري في
كتاب ريادة الاعمال ده هو كل اللي انت محتاجه علشان تعرف ازاي تحكي قصة مشروعك على السوشيال ميديا بطريقة صح، وإزاي تأثر على الناس بطريقة واقعية.
8. كتاب The Lean startup – للمؤلف اريك ريس
من أفضل الكتب عن ريادة الأعمال وتأسيس المشروعات، وبيديلك طريقة عملية وعلمية تمشي عليها لغاية ما تبدأ في تنفيذ مشروعك على أرض الواقع.
9. كتاب Think And Grow Rich – للمؤلف نابليون هيل
الكتاب ده بيوضح لك الـ 13 عادة التي بيتبعها أغلب الناجحين والمؤثرين في أي مجال. وجه نتاج دراسة وتحليل لحياة أكثر من 500 رائد أعمال ومؤسس شركة.
10. كتاب The 4-Hour Workweek– للمؤلف تيموثي فيريس
واحد من أفضل الكتب اللي بيحتاجها أي شخص عايز يسيب وظيفته ويؤسس مشروعه الخاص علشان يكون سيد قراره.
زي ما قال “Warren Buffett”، أحد أغنى خمس أشخاص في العالم، القراءة هي سمة القادة والعظماء. ومن حسن حظك إن فيه كتب عن ريادة اعمال كتير ممكن تسهل عليك الطريق بشكل كبير وتساعدك تحقق أهدافك في إنك تكون رائد اعمال ناجح وتسيب بصمتك في العالم.
